Naxçıvan Muxtar Respublikasının Qida Təhlükəsizliyi Agentliyi tərəfindən quş qripi xəstəliyinə qarşı 25-27 noyabr tarixlərində muxtar respublika ərazisində növbəti epizootoloji monitorinqlər həyata keçirilmişdir. Bununla əlaqədar risk əsasında müəyyən olunmuş təbiət əraziləri və su hövzələri ətrafında vəhşi quşlara ümumi baxış keçirilmiş, xəstəlik törədicisinin mövcudluğunun araşdırılması məqsədilə muxtar respublikada fəaliyyət göstərən sənaye əsaslı müxtəlif həcmli quşçuluq müəssisələrində və ailə təsərrüfatlarında müşahidələr aparılmış, müxtəlif növ ev quşlarından ümumilikdə 60 qan, 120 yaxma nümunəsi götürülərək Naxçıvan Qida Təhlükəsizliyi İnstitutunun Mərkəzi baytarlıq laboratoriyasında müvafiq müayinələrə cəlb edilmişdir. Həmçinin monitorinq çərçivəsində baytarlıq norma və qaydalarına əməl olunması üçün məqsədyönlü maarifləndirmə-təbliğat tədbirləri həyata keçirilmişdir.
Qarşıdakı dövrlərdə muxtar respublika ərazisində epizootoloji sabitliyin təmin edilməsi məqsədilə müxtəlif növ xüsusi təhlükəli heyvan xəstəliklərinə görə monitorinqlərin keçirilməsi və müvafiq tədbirlərin icrası davam etdiriləcəkdir.