Naxçıvan Muxtar Respublikası Qida Təhlükəsizliyi Agentliyi Naxçıvan Muxtar Respublikasının Təhsil Nazirliyi ilə birgə reallaşdırdığı “Ümumi təhsil və məktəbəqədər təhsil müəssisələrində fəaliyyət göstərən bufet və yeməkxanalar hansı normalara cavab verməlidir” mövzusuna həsr olunmuş növbəti maarifləndirici görüş Naxçıvan şəhərində yerləşən 12 nömrəli tam orta məktəbdə keçirilmişdir.
Görüş zamanı Agentliyin “Qida zəncirinə nəzarət şöbəsi”nin müdiri Orxan Orucov tərəfindən iştirakçılara xammal və yarımfabrikatlarla işləyən məktəb yeməkxanalarındakı avadanlıq və sahələr, paylayıcı məktəb bufetinin tərkibindəki sahələr, isidilmə və ventilyasiya sistemləri, su təchizatı, kanalizasiya sistemləri, qida tullantıları, qida məhsullarının saxlanması, qida obyektlərində istifadə olunan avadanlıqlara dair gigiyena tələbləri, qidanın servisi, satışı və istehlakı, qida blokunun işçi heyətinin şəxsi gigiyena qaydalarına dair tələblər haqqında məlumat verilmiş, qida təhlükəsizliyi sahəsində mövcud texniki normativ hüquqi aktların tələbləri izah edilmişdir. İştirakçılarla qarşılıqlı fikir mübadiləsi aparılmış və onları maraqlandıran suallar cavablandırılmışdır. Tədbirin sonunda müvafiq tələbləri özündə əks etdirən bildirişlər iştirakçılara təqdim edilmişdir. Bundan öncəki görüşlər ümumilikdə 4 məktəbəqədər və 51 ümumi təhsil müəssisəsi olmaqla Babək, Şahbuz, Ordubad və Culfa rayonlarının təhsil şöbələrində keçirilmişdir. Gələcəyimiz olan uşaqların sağlam qidalanması üçün bu kimi maairfləndirici görüşlər muxtar respublikanın digər rayonlarında da təşkil ediləcəkdir.