Naxçıvan Muxtar Respublikasının Qida Təhlükəsizliyi Agentliyində qida və yem məhsullarının idxalçıları ilə “idxal prosedurları və elektron bildirişlərin bəyan edilməsi qaydaları” ilə bağlı maarifləndirici görüş keçirilmişdir. Görüşdə sahibkarlara idxal qaydaları ilə bağlı qanunvericiliyin tələbləri, Avtomatlaşdırılmış Qida Təhlükəsizliyi İnformasiya Sisteminə (AQTİS) bildirişlərin daxil edilməsi qaydaları və Azərbaycan Respublikasının İnzibati Xətalar Məcəlləsindəki son dəyişikliklərə əsasən qida və yem məhsullarının, həmçinin qida məhsulları ilə təmasda olan material və məmulatların bildiriş göndərilmədən ölkə ərazisinə idxal olması ilə bağlı tətbiq olunacaq inzibati tədbirlər barədə məlumat verilmiş, sahibkarları maraqlandıran suallar cavablandırılmışdır. Tədbirin sonunda sahibkarlara maarifləndirici bildirişlər təqdim edilmişdir.