27 Sentyabr – Anım Günü ərəfəsində Naxçıvan Muxtar Respublikasının Qida Təhlükəsizliyi Agentliyinin sədri Səfəralı Nəsirov Agentliyin və tabeliyindəki qurumların rəhbər heyəti ilə birlikdə ölkəmizin ərazi bütövlüyü uğrunda qəhrəmancasına şəhid olmuş igid Vətən övladlarının məzarlarını ziyarət ediblər. Ziyarət zamanı şəhidlərin əziz xatirəsi ehtiramla yad olunub, məzarları önünə gül dəstələri qoyulub.

Daha sonra şəhid ailələri ilə görüşlər keçirilib. Agentliyin sədri Səfəralı Nəsirov Müzəffər Ali Baş Komandan İlham Əliyevin rəhbərliyi ilə cəmi 44 gün ərzində davam edən və Zəfərlə yekunlaşan müharibə zamanı şəhid olan igidlərimizin əziz xatirəsinin əbədiyyən xalqımızın yaddaşına həkk olunduğunu vurğulayıb. Bildirilib ki, şəhidlərimizin müqəddəs xatirəsi daim qəlbimizdə yaşayır və onların keçdiyi şərəfli həyat yolu gələcək nəsillər üçün əsl vətənpərvərlik nümunəsidir. Azərbaycanın ərazi bütövlüyü və suverenliyi uğrunda canından keçən şəhidlərimizin adını uca tutmaq, onların xatirəsini əbədiləşdirmək, ailə üzvlərinə diqqət və qayğı göstərmək hər bir vətəndaşın müqəddəs borcudur.