Naxçıvan Muxtar Respublikasının Qida Təhlükəsizliyi Agentliyi tərəfindən pestisid və aqrokimyəvi maddələrin istehsalı, saxlanması, satışı və tətbiqinə nəzarət tədbirləri davam etdirilir.
Agentliyin 2026-cı il üzrə Fəaliyyət Planına uyğun olaraq, ümumilikdə 30 obyektdə monitorinq aparılmışdır.
Monitorinqlər zamanı müəssisələrin texniki təhlükəsizlik və sanitariya-gigiyena tələblərinə uyğunluğu qiymətləndirilib, qeydiyyatsız, tərkibi qadağan olunmuş, hermetikliyi pozulmuş və istifadə müddəti bitmiş preparatların dövriyyəyə buraxılmasının qarşısı alınıb.
Belə ki, 2026-cı ilin ilk 3 ayı ərzində aparılmış monitorinq və yoxlamalar zamanı ümumilikdə 3 müəssisədə istifadəyə yararsız 6 adda (16,8 kq/litr) pestisid və 2 adda (21 kq/litr) aqrokimyəvi maddə aşkar edilmişdir. Həmin maddələrə toxunulmazlıq qoyulmuş və təhlükəsiz qaydada zərərsizləşdirilməsi təmin olunacaqdır.
Görülən tədbirlərin əsas məqsədi pestisid və aqrokimyəvi maddələrin dövriyyəsində təhlükəsizliyin təmin edilməsi, saxtalaşdırma hallarının qarşısının alınması və fermerlərin keyfiyyətli preparatlara əlçatanlığının təmin edilməsidir.
Agentlik fermerləri və digər istifadəçiləri istifadə müddəti bitmiş, hermetikliyi pozulmuş və mənşəyi şübhəli məhsulları əldə etməməyə çağırır. Şübhəli, uyğunsuz və ya keyfiyyətsiz məhsulla qarşılaşdıqda Agentliyin (036) 545-28-83 nömrəli əlaqə telefonuna məlumat verilməsi tövsiyə olunur.