Agentlik əməkdaşları tərəfindən Naxçıvan şəhərində fəaliyyət göstərən şirniyyat istehsalı müəssisəsində plandankənar yoxlama keçirilib. Yoxlama zamanı müəssisədə qida təhlükəsizliyi sahəsində normativ hüquqi aktların, sanitariya norma və qaydalarının, gigiyena normativlərinin tələblərinə əməl olunmadığı aşkar edilib. Belə ki, satışa təqdim olunan şirniyyat məhsullarının üzərində zəruri məlumatların olmadığı, xammal kimi istifadə olunan məhsulların istehsal sahəsində saxlanıldığı, yararlılıq müddəti ötmüş məhsulların satışının həyata keçirildiyi və işçi heyətinin dövri tibbi müayinədən keçmədiyi müəyyədən edilib. Aşkar olunmuş nöqsanlarla bağlı sahibkarlıq subyekti inzibati məsuliyyətə cəlb edilib. Agentlik tərəfindən əhalinin sağlamlığının qorunması və təhlükəsiz qida məhsulları ilə təmin olunması istiqamətində ardıcıl tədbirlər davam etdiriləcək və istehlakçı hüquqlarının pozulmasına yönəlmiş qanunsuz halların qarşısı bundan sonra da qətiyyətlə alınacaqdır.