Ümumdünya Heyvan Sağlamlığı Təşkilatının (bundan sonra - ÜHST) yayımladığı məlumatlara əsasən, yüksək patogen quş qripi (bundan sonra-YPQQ) xəstəliyinin yaratdığı gərginlik artaraq getdikcə daha kəskin xarakter almaqdadır. Belə ki, xəstəlik mənşə etibarilə ancaq quşlarda başvermə xüsusiyyətindən çıxaraq digər növlərə aid olan məhsuldar ev heyvanlarında və vəhşi heyvanlarda, o cümlədən suda yaşayan heyvanlarda da aşkar edilmişdir. 2024-cü ilin noyabr ayı ərzində quşlardan başqa otuz heyvan növündə sözügedən xəstəliyə rast gəlinmişdir. Xüsusilə, ABŞ-da südlük qaramalda xəstəliyin aşkar edilməsi dünya ictimaiyyətində ciddi narahatlıq doğurur. Avropa Qida Təhlükəsizliyi Təşkilatı artan dinamika ilə davam edən xəstəliyin Şimal yarımkürəsinə yayılaraq endemik xarakter almasını ciddi şəkildə bildirmişdir. YPQQ virusu növ baryerlərini aşmaqla vəhşi və ev heyvanları, habelə insanlar üçün ciddi təhlükə törədə bilər. Ölkəmizin YPQQ-yə görə hazırlıq səviyyəsi daimi olaraq diqqət mərkəzində saxlanılmaqla il ərzində minimum yeddi dəfə epizootoloji monitorinqlər keçirilir və yekun hesabatlar ÜHST-ə təqdim edilir. Təsadüfi deyil ki, 2024-cü ildə ölkəmizin YPQQ-dən azad olma statusu ÜHST tərəfindən təsdiq edilmişdir. Bununla yanaşı, hazırda dünyada yaranmış epizootik vəziyyətlə əlaqədar gücləndirilmiş profilaktik tədbirlərin həyata keçirilməsinə zərurət yaranmışdır. Qeyd olunanları nəzərə alaraq, muxtar respublika ərazisində bioloji təhlükəsizliyin qorunması məqsədilə Naxçıvan Muxtar Respublikasının Qida Təhlükəsizliyi Agentliyinin əməkdaşları tərəfindən Naxçıvan Muxtar Respublikasında fəaliyyət göstərən quşçuluq müəssisələrinin sahibkarları ilə maarifləndirici görüş keçirilmiş və məlumat xarakterli bildirişlər paylanılmışdır.Həmçinin sahibkarlara müəssisədə olan quşlar arasında hər hansı şübhəli hal baş verərsə aidiyyatı üzrə dərhal məlumat verilməsi tövsiyyə edilmişdir.