Naxçıvan Muxtar Respublikasının Qida Təhlükəsizliyi Agentliyi tərəfindən 2024-cü ilin 1-ci yarımilində Naxçıvan Muxtar Respublikası Təhsil Nazirliyinin dəstəyilə muxtar respublikanın bütün təhsil şöbələrində məktbəqədər və ümumtəhsil müəssisələrinin rəhbərlərinin iştirakı ilə qida blokunda çalışan işçilərlə maarifləndirici görüşlər keçirilmiş və qida təhlükəsizliyi sahəsində texniki normativ hüquqi aktların tələblərini özündə əks etdirən bildirişlər təqdim edilmişdir.
​Növbəti aylar ərzində qidalanmanın qanunvericilikdə nəzərdə tutulan normalara uyğun təşkil edilməsi, qida təhlükəsizliyi sahəsində texniki normativ hüquqi aktların tələblərinin yerinə yetirilməsi vəziyyətinin qiymətləndirilməsi, həmçinin yeyinti məhsullarının tədarük prosesi, onların saxlanması, daşınması, realizə olunması, markalanma və qablaşdırılmasına dair tələblərə əməl edilməsi vəziyyətini öyrənmək məqsədilə Agentlik tərəfindən sözügedən təhsil müəssisələrinin bufet və yeməkxanalarında monitorinqlər həyata keçirilmişdir. Monitorinqlər zamanı bir sıra nöqsanlar aşkarlanmışdır. Belə ki, bir neçə müəssisədə qida blokunda çalışan işçilərin tibbi yoxlamadan natamam keçdiyi, qida məhsullarının uyğun temperaturda saxlanılmadığı, üzərində etiket məlumatları və müvafiq müşaiyətedici sənədləri olmayan qida məhsullarının satışının həyata keçirildiyi və gigeynik qaydalara əməl olunmadığı müəyyən edilmişdir. Pozuntular aşkarlanmış müəssisə rəhbərlərinə ciddi xəbərdarlıq edilmiş, istifadəyə yararsız qida məhsulları satış dövriyyəsindən çıxarılmışdır.
​Təkrar monitorinqlər zamanı müəssisələrdə düzəldici fəaliyyətin həyata keçirildiyi və aşkarlanmış nöqsanların aradan qaldırıldığı müşahidə olunmuşdur. Həmçinin təchizatçılar tərəfindən məktəbəqədər təhsil müəssisələrinə kərə yağı altında bitki tərkibli spred yağların verilməsi faktı aşkarlanmışdır. Aşkarlanmış yağların istifadəsinin qarşısı alınmışdır. Azyaşlıların və məktəblilərin hüquqlarının müdafiəsi istiqamətində bundan sonra da Agentlik tərəfindən bu kimi nəzarət tədbirləti davam etdiriləcəkdir.