Naxçıvan Muxtar Respublikasının Qida Təhlükəsizliyi Agentliyi tərəfindən mənşəyi bilinməyən saxta zeytun yağları satış dövriyyəsindən kənarlaşdırılıb

Naxçıvan Muxtar Respublikasının Qida Təhlükəsizliyi Agentliyi tərəfindən aparılan nəzarət tədbirləri zamanı satış yerlərində olan “Saklıvadi” əmtəə nişanlı zeytun yağlarının fərqli qablaşdırılması və etiketlənməsi, idxal sağlamlıq aktı və müvafiq müşaiyətedici sənədlərinin olmaması bu məhsulların həqiqiliyi və mənşəyi barədə əsaslı şübhələr yaratmışdır.
Faktla bağlı qanunvericiliyə uyğun olaraq Agentlik tərəfindən dərhal müvafiq tədbirlər görülmüşdür. Belə ki, muxtar respublikada fəaliyyət göstərən 1 topdansatış anbarında 145 ədəd, 40 pərakəndə satış mağazasında 196 ədəd olmaqla ümumilikdə satışda olan 341 ədəd 5 ltirlik qablaşdırmada “Saklıvadi” əmtəə nişanlı zeytun yağlarının toxunulmaması təmin edilərək dövriyyəsi dayandırılmışdır. Adıçəkilən məhsullardan sınaq məqsədilə 3 ədəd nümunə seçilərək Azərbaycan Qida Təhlükəsizliyi İnstitutunun müvafiq laboratoriyasına təqdim olunmuşdur.
Sınaq nəticələrinə əsasən hər üç yağ nümunəsində keyfiyyət göstəricilərində bır sıra uyğunsuzluqlar aşkar edilmiş, bundan əlavə yağ-turşu tərkibi üzrə əldə olunan müayinə nəticələrinə əsasən məhsulun təmiz zeytun yağı deyil, bitki mənşəli yağ qarışığından ibarət olduğu müəyyən edilmişdir.
İnsanların həyat və sağlamlığı baxımından vəziyyətin ciddiliyini nəzərə alaraq Agentlik tərəfindən müvafiq tədbirlər görülmüşdür. Belə ki, 338 ədəd 5 litrlik qablaşdırmada (1690 litr) “Saklıvadi” əmtəə nişanlı saxta zeytun yağlarının utilizasiyası barədə qərar qəbul edilmişdir. Naxçıvan Muxtar Respublikasının Qida Təhlükəsizliyi Agentliyi istehlakçı hüquqlarının qorunması, həmçinin qida təhlükəsizliyinin təmin edilməsi istiqamətində tədbirləri bundan sonra da davam etdirəcəkdir.