Agentlik tərəfindən Naxçıvan şəhəri, Ə.Əliyev küçəsi 5A ünvanında fəaliyyət göstərən Zeynalov Şükür Abbas oğluna məxsus kafedə aparılan planlı yoxlama zamanı nöqsanlar aşkar edilmişdir.
Belə ki, mətbəxdə divar və tavan səthlərinin tamlığı pozulduğu, yuyucu maddələr və dezinfeksiyaedici vasitələrin saxlanması üçün xüsusi yerlərin təşkil edilmədiyi, birdəfəlik nəzərdə tutulmuş qablaşdırma vasitələrindən təkrar istifadə olunduğu, soyuducu rəflərinin korroziyaya uğradığı, işçilərin xüsusi geyimlə təmin edilmədiyi, qida məhsulu ilə təmasda olan altlıqların təmiz saxlanılmadığı, dezinfeksiya işlərinin aparılmadığı və sənədləşdirilmədiyi aşkarlanmışdır. Aşkarlanmış nöqsanların aradan qaldırılması üçün müvafiq göstərişlər verilmiş, sahibkar barəsində inzibati protokol tərtib olunmuşdur. Bu kimi halların baş verməməsi məqsədilə Agentlik tərəfindən mütəmadi olaraq bütün qida obyektləri dəfələrlə maarifləndirilmiş və müvafiq göstərişlər verilmişdir. Verilmiş tapşırıqların yerinə yetirilməsi və istehlakçı hüquqlarının müdafiəsi istiqamətində nəzarət tədbirləri davam etdirilir və aşkarlanmış nöqsanlarla bağlı zəruri tədbirlər görüləcəkdir.