Agentlik tərəfindən Naxçıvan şəhəri, Ə.Əliyev küçəsi ev 72 ünvanında fəaliyyət göstərən Muradova Afilə Qadir qızına məxsus “Nəsimi-M” çörək emalı müəssisəsində aparılan planlı yoxlama zamanı ciddi nöqsanlar aşkar edilmişdir. Belə ki, döşəmə, divar və tavan səthlərinin tamlığının pozulduğu, giriş qapısı və xaricə açılan pəncərələrin qoruyucu tor örtüklə təmin edilmədiyi, əllərin yuyulması üçün sahələr müvafiq qaydada yerləşdirilmiş əlyuma çanaqları ilə təchiz olunmadığı, qida obyektində dezinfeksiya işlərinin aparılmadığı, birdəfəlik nəzərdə tutulan qablardan təkrar istifadə olunduğu, yuyucu maddələr və dezinfeksiyaedici vasitələrin saxlanması üçün xüsusi yerlərin təşkil edilmədiyi, tullantıların ağzı kip bağlanan, qoxu yaymayan və su keçirməyən paketlərdə, tullantılar üçün ayrılmış xüsusi qablarda saxlanılmadığı aşkarlanmışdır. Aşkarlanmış nöqsanların aradan qaldırılması üçün müvafiq göstərişlər verilmiş, sahibkar barəsində inzibati protokol tərtib olunmuşdur. Bu kimi halların baş verməməsi məqsədilə Agentlik tərəfindən mütəmadi olaraq bütün qida obyektləri dəfələrlə maarifləndirilmiş və müvafiq göstərişlər verilmişdir. Verilmiş tapşırıqların yerinə yetirilməsi və istehlakçı hüquqlarının müdafiəsi istiqamətində nəzarət tədbirləri davam etdirilir və aşkarlanmış nöqsanlarla bağlı zəruri tədbirlər görüləcəkdir.